اطاعت میں ہروہ کام  شامل ہے، جن سے بچنے کا حکم ہے (تو ان سے بچنا اطاعت ہے) اور وہ کام  بھی داخل  ہیں جنہیں کرنے کا حکم اِرْشادفرمایا ہے ،جیسے نماز پڑھنا اوردیگر نیک کام کرناضروری ہیں،اسی طرح جُھوٹ، غیبت، وغیرہ گُناہوں سے اِجْتناب بھی  لازِم ہے،مگرافسوس! آج کے بعض نادان مُسلمان صرف نام کے رہ گئے ہیں نہ کردار (Character)  میں  دِین کی کوئی نشانی نظر آتی ہے  نہ  اخلاق میں حضور صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ کے اخلاق کی  جھلک نظر آتی ہے ،   نہ اعمال میں   بزرگانِ دین کی  پیروی نظر آتی ہے، بدقِسمتی سے گناہوں پرایک دُوسرے کی مددتوکی جاتی ہے مگرنیکی کے کاموں میں شیطان لعین رُکاوٹیں ڈال دیتاہے، لڑائی جھگڑے  عام ہوتے  جارہے ہیں ، سُنّتوں کا مذاق اُڑا یا جا رہا ہے، نہ بیٹا باپ کی قدر  پہچان رہا ہے نہ بیٹی ماں کی قدردان ہے ،جس طرف نظر اُٹھائیے بے عملی ،بے راہ روی اور سُنَّتوں  کی خِلاف  وَرزی کے دل سَوز نَظارے ہیں۔زبانی عشقِ رسول کا دعویٰ کرنے والےنادانوں کوامیرِ اہلسنّت،بانئِ دعوتِ اسلامی مدنی چوٹ کرتے اورسمجھاتے ہوئے اپنے مجموعۂ    کلام"وسائلِ بخشش"میں کچھ یوں فرماتے ہیں:

بے نمازی رہیں کچھ نہ روزے رکھیں                              اُن کو کس نے کہا؟ عاشِقانِ رسول

عالموں پر ہنسیں،پَھبتیاں بھی کَسَیں                                                 اُن کو کس نے کہا؟ عاشِقانِ رسول

جو کہ گانے سنیں، فلم بِینی کریں                                                        اُن کو کس نے کہا؟ عاشِقانِ رسول

بد نگاہی کریں، بد کلامی کریں                                                               اُن کو کس نے کہا؟ عاشِقانِ رسول

کھائیں رزقِ حرام ، ایسے ہیں بد لگام                          اُن کو کس نے کہا؟ عاشِقانِ رسول

عَہد توڑا کریں ، جھوٹ بولا کریں                               اُن کو کس نے کہا؟ عاشِقانِ رسول

جو ستاتے رہیں دل دُکھاتے رہیں                               اُن کو کس نے کہا؟ عاشِقانِ رسول

چغلیوں تہمتوں ، میں جو مشغول ہوں                                             اُن کو کس نے کہا؟ عاشِقانِ رسول

گالیاں جو بکیں عیب بھی نہ ڈھکیں                                                 اُن کو کس نے کہا؟ عاشِقانِ رسول

داڑھیاں جو مُنڈائیں کریں غیبتیں                          اُن کو کس نے کہا؟ عاشِقانِ رسول